Sabtu, 27 Maret 2010

Bujang Pusako

Alah tatuah di ranah minang Bujang pusako rang bijaksano
Manyingguang urang inyo bapantang
Apo lai gadang nan kamalendo


Jikok bakato di bawah-bawah
Kok nyo manyauak di ilia-ilia
Indak nyo suko mahajan tuah
Bakato sopan indak manggisia



Bujang pusako sibujang ramah
Tak  dangki jo tinggi hati
Galak manih kucindan murah
Disayang urang sanagari



Pandai manggantang aia lauik
Pandai manyalam dalam bumi
Tau di rantiang ka manyangkuik
Pandai mangaji baso basi



Indak batanggang ba habih minyak
Tak nyo bak siang ba habih hari
Namuah batanyo rajin manyimak
Kalau baraja  sapanuah hati



Hati lapang paham tak sampik
Pandai manimbang jo manaka
Walau batenggang di nan rumik
Indak Bakisa di nan bana



Indak mangecek  ba hati kusuik
Muko nan janiah di nampakkan
Walau harimau di dalam paruik
Kambiang juo nan dikaluakan



Pandai ma uleh rumin putuih
Tau di bayang kato tibo
Tinggi taratik jo mujilih
Paga adaik benteang pusako



Tau di rantiang ka mancucuak
Tau di dahan ka ma manimpo
Tau di ratak sabalun lapuak
Bujang arih rang bijaksano



Di nan dalam tak bagalombang
Di nan dangka tak nyo bariak
Di sakik hiduik indak tagamang
Kanan Kuaso inyo mamintak



Kalau  baragiah jo mambari
Indak maharok baleh jaso
Jariah nan indak dikana lai
Bia nan satu Manilainyo



Itulah sipaik nan nyo pakai
Bujang banamo bujang pusako
Bago tatungkuik tagulampai
Bapantang rusak rumah tango



Iman nyo taguah bapandirian
Ba istiqamah batauhid pulo
Dek kawan kawan jadi panutan
Rang kampuang sayang kasadonyo



Jikok bakato indak manyingguang
Kok bapambari jo randah hati
Jadi Panutan dek urang kampuang
Sumarak urang sanagari



Indak ba rajo ka hati surang
Ba sutan ka mato inyo tido
Kayo ka tampek rang batenggang
Cadiak ka bakeh rang batanyo



Ibaraik baringin ditangah padang
Urek tahunjam kapitalo
Aka nyo kuaik baurek tunggang
Panuahlah bumi dek rumpunnyo.

Dek gampo indak taruntuahkan
Takkan nyo tumbang dek limbubu
Dek badai indak ta-oleangkan
Konon lah goyang angin lalu.

Bapucuak cewang ka udaro
Tinggi manggapai awan biru
Kok ureknyo tampek baselo
Jadi Pidoman musafir lalu



Sungguah batang tinggi manjulang
Tapi tingginyo manaungi
Dahan nan rampak ka bagantuang
Jikalau Paneh ka payuang panji

Cilako Bujang

Dikacak langan lah bak langan Dikacak Batih Lah Bak Batih
Ka Urang kampuang balanteh angan
Tak ado taratik jo mujilih

Masuak Kampuang kalua kampuang
Itu Karajo sapanjang hari
Banyak kecek banyak malancuang
Lain dumuluik lain di hati

Awak maraso paliang santiang
Awak si Anu janyo awak
Suko manuhuak kawan sairing
Nan pantiang lapeh sagalo kandak

Hilia mudiak mamacah parang
Kiri kanan manyerak tubo
Suko mangecek bakaruak arang
Urang disalahkan kasadonyo

Asuang siantek badarai darai
Jungkek jo patiang di hati nyo
Sayang di urang ka bacarai
Urang ba elok sakik hatinyo

Kecek gadang ndak batimbangan
Tinggi ruok dari boto
Nan dek urang sagalo bukan
Nan dek inyo sagalo iyo

Sapantun jo daun simantuang
Muko balakang babeda rono
Lah heboh urang dalam kampuang
Dek ulah laku parangainyo

Tagak suko di simpang jalan
Tagak Bak cando ka mambali
Nampak sakileh bantuak juragan
Saku-saku indak barisi

Duduak nyo suko ma ampang lalu
Duduak Bak cando ka manjua
Bantuak sarupo barang bermutu
Alun di ago alah tajua

Ilia mudiak inyo manyusah
Dari jorong ka sapanuah koto
Aka buruak itikaik salah
Barang ta umbai nak nyo elo

Kok ado gadih nan lalu
Urang di imbau kasadonyo
Indak ado dek urang nan katuju
Malapeh hao kasudahannyo

Bak pimpiang tumbuah dilereang
Cok baliang-baliang di ateh bukik
Dalam angguak nyo manggeleang
Lain di hati lain di muluik

Angguak anggak geleang namuah
Unjuak nan indak babarikan
Suko manangguak di aia karuah
Namuah Mangguntiang dalam lipatan

Galia nyo licik indak babateh
Iyo jo Indak bisa nyo tuka
Kalau taimpik nak di ateh
Jikok takuruang nyo nak dilua

Kok gayanyo usah disabuik
Bisa takicuah urang sabalai
Bantuak sarupo bareh sipuluik
Tapi ditanak badara-darai

Tibo di medan nan bapaneh
Lagak bak cando urang nan punyo
Walau bantuak saroman ameh
Kanai sapuah maleleh juo

Geleang sarupo siriah bareh
Indak dikana tampuak ka lisuik
Nyo sangko cakak ndak kababaleh
Indak nyo ingek sanang ka sakik

Lonjak bak labu dibanamkan
Ibaraik kacang di abuih ciek
Sombong jo angkuah nyo pahamkan
Ukuran diri indak jo ingek

Ibaraik kudo tak ba kakang
Arang kareh manyipak nyipak
Jangguik taba ajaran kurang
Manaruah dangki jo sipaik tamak

Ikua kupik kapalo randah
Jalan sampik manyipak juo
Tak ado malu jo raso salah
Indak punyo raso jo pareso

Mantang tapacik di ulu padang
Gilo marambah suok kida
Sipaik nyo picik indak manenggang
Apo talatak inyo semba

Lidah aia Urang imbaukan
Suko takabua dalam hati
Indak manaruah malu jo sopan
Ereang jo gendeang apo lai

Bujang cilako  bujang parisau
Mabuak khayal jo angan-angan
Ibaraik payuang tabukak kasau
Dalam mimpi nyo barasian

Siang malam bahati rindu
Patang pagi bahati rambang
Balum bahimbau lah manuju
Balun dikabik nyo lah datang

Kok karajo balabiah cangkua
Kok ka makan kurang pinggan
Usah nan barek ka nyo pikua
Nan ringan sajo inyo anggan

Namuah batanggang ba abih minyak
Suko bak siang ba habih hari
Urang bakarajo nyo lalol lamak
Siang nyo sangko malam hari

Umpamo binalu iduik di dahan
Maisok makan dari inang
Takuik urang namuah bakawan
Apo lai kasalang tenggang

Asa lai ka dapek nan katuju
Namuah manyambah mamintak-mintak
Ibaraik kudo bakandak sagu
Namuah disuruah ma elo bajak

Jiko di bari baumpamo
Labak ibaraik siriah Aia
Tajua indak di ago tido
Antah kok jadi sarok balai

Gilo ma umbi jo ma umbuak
surang tak ado gadih nan nio
Mungkin ka jadi bujang lapuak
Di surau tingga tampek lalok nyo
Nan kanduang dagang dirantau
Jaweklah pasan ranah tapian
Kami kok indak ka dagang silau
Surek sapucuak toloang layangkan

Kirimkan kami surek sapucuak
Elok jo buruak di baritokan
Rusuah nak samo kito pujuak
Gamang nak samo di rasokan Batanyo urang bakeh kami
Apolah rundiang ka kami jawab
Saribu sasa dalam hati
Dagang bangih indak basabab

Manuruik carito kaba buruang
Daganglah banyak salah jalan
Bujang banyak ditangkok binguang
Gadih lah banyak nan hilang pidoman

Kok batua nan tajadi
Mungkin dagang malulua sumpah
Lah hilang cahayo matohari
Kiamat nagari Rasulullah

Kami lapeh dagang bajalan
Bukan doh untuak marantau cino
Mancari ilmu jo pangalaman
Mambangun kampuang jo pusako

Tapi kini apo disabuik
Balain tasuo jo nan di cinto
Layangan putuih bananglah kusuik
Kumpalan apo lai gunonyo

Kami tak harok jo pakirim
Asa batamu kamilah sanang
Ka panjago silaturrahim
Pamupuak kasih jo sayang

Tapi kini apo di baco
Kaba indak baritopun indak
Surek sapucuak haram tibo
Lah hilang rindu jo taragak

Jalan salangkah lupo suruik
Dek lamak lenggok malenggang
Gilo dek rayu rumpuik saruik
Sirieh mawa layue di batang

Dagang lah mabuak jo kiambang
Di kampuang mawa lah jadi karisiek
Manangih lasuang di pintu kandang
Kinantan tabang tak babaliak

Padi taserak lah jadi salibu
Jaguang di kaka lah ba urek
Banang lawah manutuik pintu
Kandang lapuak sangkak lah ruek

Surau langang balailah sunyi
Lah hilang lagu dek badendang
Tapian indak sumarak lai
Ayie janieh ikan mahilang

Labuah luruih kini manyimpang
ulah di aliah urang lalu
Cupak di tuka rang padagang
Lah abih galeh baru tau

Pinang mudo layua dibatang
arai mayang manyasak kulik
Sadah masiek gambielah jalang
Carano lah jadi barang antic

Tamanuang pinyaram jo kalamai
Ajik maratok di kuali
Tak mungkin lai badan tapakai
baralek gadang lah jarang kini

Antah ka jadi ka buah tangan
Panyanangan hati rang di jao
Elok katiko sadang makan
Kanyanglah lupo dima asanyo

Manyasa puluik jadi katan
Urang bakandak bareh ampiang
Angek pariuak lah di tahan
Urang manulak masuak piriang

Lai bana badan tapakai
Indak labieh ka kawan kopi
Ta onggok duduak dalam kadai
Manunggu urang minum pagi

Dimakan urang sambie galak
Ma ota sambie bagarah
Lai bana mangatokan lamak
Di harago bakandak murah

ratok kok lai dagang simak
Himbau kok lai basahuti
Pintak kami indak doh banyak
Pulang kampuang janguaklah nagari

Tatumpah kasieh di jao
Sayang jo kami usah lupokan
Usah turuikkan pandangan mato
Kato bathin cubo dangakan

Condoang ka nan rancak pandangan mato
Condoang salero ka nan lamak
Kalau lah syetan nan mandayo
Kadang tubo tasangko ubek

Itu di kami nan marusuah
Dagang kok mabuak jo kiambang
Mukasuik mahapuih paluah
Palak lapeh gata nan datang

Ingek ingek sabalun kanai
Bakulimek sabalun abih
pinjaik dapek kapak tagadai
Kok batuka galak jo tangih

Kok nyampang surek indak babaleh
Kaba kok indak datang juo
Isi mukasuik kok kurang jaleh
Dangakan sajo surek ka duo…
Sumber :website Cimbuak.net