Rang bansaik

Tinggi bukik Gunuang Singgalang
Satantang jo Gunuang Marapi
Ratak nan ma, denai nan malang
Awak bansaik, urang lah banci

Oh, antahlah di den nan mak oi …

Hari jumaik rami balainyo
Tanamo balai Padang Panjang
Oi, ka galak lai basamo
Oi, manangih den tangguang surang

Oh, hari lah malam candonyo …

Kok rimbo, iko parak den
Den cubo batanam lado
Jikok kayo, iko kakak den
Lah bansaik, haram disilaunyo

Oh, antok den di bak nan ko kak …

Awak bansaik paibo hati
Ka sia untuang dikadukan
Tumbuah di musim nan bak kini
Tagak basisiah kawan-kawan

Oh, hari lah laruik candonyo …

Tasisiah bansaik dek nan kayo
Baitu dunia urang kini
Lah banci urang kasadonyo
Ka ma denai batenggang lai

Oh, japuik den baliak mande oi …

Mandaki Gunuang Singgalang
Ka banak tulang ko dinginnyo
Ratak tangan denai nan malang
Awak bansaik, hati paibo

Oh, antahlah di den ambo oi …

Kok lai bana badunsanak
Ka nan kayo tunggang sayangnyo
Malang batimpak di nan indak
Badan baurai aia mato

Oh, japuik den baliak mande oi …

Durian Runtuah

Baruntuang mande baranak bujang
Kini dilapeh pai ka rantau
Rajin sakolah dirantau urang
Dapek ijazah tabaok pulang

Jikok takabua pinto mande
Denai mujua jadi urang gadang
Perak jo ameh bialah nak tandeh
Yo anak mande lah boco aluih

Baruntuang dapek durian runtuah
Ondeh mande, lah dapek makonyo rusuah
Sakolah apo denai di Jawo
Mako ijazah sampai S2

Kok anak gadih nan denai baok pulang
Indak ado ciek alah juo

P.T.P

P.T.T.


Oi Adiak, tau lah di untuang
Alah co iko pandangaran
Usah lah banyak kandak juo
Iko jo itu nan bamintak
Sadangkan aden tak bakarajo

Kok jo a den kau nak bakandak
Kandak indak dapek diharok
Hiduik lah bak cando narako
Bagala P.T.T. aratinyo … Pangangguran Tingkek Tinggi

Ka ateh indak lah bapucuak
Ka bawah indak lah baurek
Di tangah digiriak ulek
Co itu bana yo Diak oi

Kok bamintuo lai kayo
Baladang cangkeh nan jo palo
Tinggalah dulu samantaro
Malakik aden bakarajo

Hiduik di Rantau


Tapana hati di pasia putiah
Lamunan tinggi … tamanuang
Sasayuik mato mamandang
Lautan laweh mambantang

Jauah di tapi langik … di baliak awan
Di sinan den dilahiakan … Minang den sayang

Tangiang juo di talingo
Carito nan den dangakan
Hiduik di nagari urang
Nan bagalimang cahayo

Mako denai marantau … tingga lah kampuang
Tagadai sawah jo ladang … tingga di rantau urang

Tingga kulik pambaluik tulang
Badan kuruih, rasaki malang
Dapek pagi, abihnyo patang

Sakik, sakik … sakik lah surang
Imbau, imbau … tido nan datang
Badan sansai tingga sabatang … hiduik di rantau urang
Malang, dirunduang malang … hiduik di rantau subarang

Takana tampek di Taluak Bayua
Di sinan denai dilapeh
Sasayuik mato mamandang
Mamandang … denai tabayang

Jauah di baliak awan … di Ranah Minang
Di sinan den dilahiakan … Minang den sayang

Badan tingga sabatang … hiduik di rantau urang
Malang, dirunduang malang … hiduik di rantau subarang
Kadang lalok bagaluang … dingin badan tak makan
Badan lah tingga tulang … ka ma ka dikadukan

Simalakamo

Simalakamo


Usah bundo bakato, denai anak durhako
Indak mukasuik hati malawan bundo
Lai den cubo manuruikkan kato bundo
Tapi baa lah .. inyo den cinto

Adiak nan denai cinto, usah balaruik juo
Angan jo mimpi ndak jadi nyato
Sabana bedo .. kami sabana tabedo
Bak makan buah simalakamo

Tuhan .. kami ndak badayo
Tunjuakkan baa jalan nan bana
Kasiahnyo bundo, kasiahnyo cinto
Samo-samo iyo .. nan samo mulianyo

ALAH KA BA'A LAI

Alah Ka Ba’a


Alah ka ba’a ko lai, ka manga badan
Lah lupo kini .. kampuang halaman

Denai ndak suko kini pai ka ladang
Nan den suko kini .. pai ka lereang
Denai ndak suko kini jo randang padang
Nan den suko kini .. tempe bagoreang

Alah ka ba’a ko lai, lah malang badan
Lah lupo kini .. ranah tapian

Denai ndak suko kini pai badayuang
Nan den suko kini .. mandi baranang
Denai ndak suko kini makan bacambuang
Nan den suko makan nasi babonsang

Pituah Rang Tuo Kito


Nan sakapa lah diambiak urang
Nan sapinjek tingga di awak

Walau dibalun sabalun kuku
Jikok dikambang saleba alam
Walau sagadang bijo labu
Bumi jo langik ado di dalam

Latiak-latiak tabang ka pinang
Singgah manyasok bungo rayo
Aia satitiak dalam pinang
Sinan bamain ikan rayo

Baburu babi ka Batu Balang
Mandapek buluah jo rotan
Guru mati kitab lah hilang
Sasek ka sia ditanyokan

Oi Buyuang, lakehlah gadang
Ka pambangkik batang tarandam
Ka paapuih malu di kaniang
Ka panunggu piutang lamo
Ka panapiak mato padang
Ka panantang matohari
Ka palawan dunia urang
Ka pandiri pusako lamo

Bilo kato lah ditanam di hati
Jalehlah sagalo rahasio alam
Jikok diajun sitamba lamo
Sabarih indak buliah ilang
Satitiak bapantang lupo

Laka jo dulang di dalam lubuak
Pandan baduri malendo jalan
Aka hilang, paham tatumbuak
Basarah diri kapado Tuhan

Kilek camin lah ka muko
Kilek baliuang lah ka kaki
Kilek kato lah ka hati

Tahu di ombak nan basabuang
Tahu di angin nan basiuak
Tahu di rantiang ka malantiang
Tahu di duri nan ka mancucuak
Tahu di dahan nan ka mahimpok
Tahu di tunggua nan ka manaruang

Ingek-ingek sabalun kanai
Nan di bawah kok mahimpik
Gabak di hulu tando ka hujan
Cewang di langik tando ka paneh

Manusia tahan kieh
Binatang tahan palu
Tagisia labiah bak kanai
Tasingguang labiah bak jadi
Diagak mako diagiah
Dibaliak mako dibalah
Bajalan manuju bateh
Balaia manuju pulau

Kuaik rumah karano sandi
Rusak sandi rumah binaso
Kuaik bangso karano budi
Rusak budi hancualah bangso

Basilek di ujuang lidah
Malangkah di pangka karih
Bamain di ujuang padang
Tahan dikieh kato putuih
Tahu di kilek sarato bayang
Tahu di gelek kato habih
Tahu di hereang jo gendeang
Sarato kurenah jo bainah

Bapikia palito hati
Nanang saribu aka
Taraso lamak, jan dilulua
Taraso pahik, jan diluahkan
Bajalan injek-injek langkah
Bakato paliharo lidah

Hiduik jan bak pucuak aru
Maikuik kama kareh angin
Iyokan nan di urang
Lalukan nan di awak

Tunjuak luruih, kalingkiang bakaik
Guntianglah baju nak Rang Guguak
Dijaik jan disudahkan
Baok kakincia malah dahulu
Kok manih, jan diraguak
Kok paik, jan diluahkan
Baok bapikia malah dahulu

Adaik mudo manangguang rindu
Adaik tuo manangguang ragam
Kok condong, jan kamari rabah
Luruih tantang barih adaik

Budi jan tajua
Paham jan tagadai
Kok kayo, kayo dek budi
Nak mulia, mulia dek baso
Budi nan indak katinjauan
Paham nan indak kamaliangan

Iman nan tak buliah ratak
Kamudi nan tak buliah patah
Padoman nan tak buliah tagelek
Haluan nan tak buliah barubah

Sayang jo anak, dilacuik
Sayang jo kampuang, ditinggakan
Hujan ameh di nagari urang
Hujan batu di nagari awak
Kampuang nan jauah dibantu juo

Mati batungkek budi
Hiduik bakarilaan
Dipakai raso jo pareso
Ditimbang jo nyao badan

Nak luruih, rantangkan tali
Nak tinggi, tingkekkan budi
Nak aluih, babaso basi
Nak elok, lapangkan hati
Nak mulia, tapek’i janji
Nak taguah, paham dikunci
Nak kayo, kuaik mancari
Nak tuah, batabua budi
Nak namo, tinggakan jaso
Nak pandai, rajin baraja

Ka hilia, jalan ka Padang
Ka mudiak, jalan ka Ulakan
Kok musuah indak dihadang
Kok basuo pantang diilakkan

Jikok indak basuo dijalannyo
Namuah bapua-pua dagiang
Namuah bakacau-kacau darah
Tando sabana laki-laki

Gasiang Tangkurak


Indak kayu, janjang dikapiang
Asa kan dapek urang den cinto
Iyo tangkurak, namonyo gasiang
Pai disuruah nan disarayo

Gasiang batali jo kain kapan
Di patang kamih, malam jumaik
Gasiang tangkurak nan den nyanyikan
Putuihlah gasiang, putuih makripaik

Lah manggabubu asok kumayan
Urang di dunia banyak kiramaik
Tolong … tolong lah jihin, si rajo awan

Gasiang tangkurak baoklah pasan
Jikoknya lalok, tolong jagokan
Jikoknya tagak, suruah bajalan
Di siko kini, denai nantikan

Tolonglah japuik, japuik tabao
Suruahnyo sujuik di kaki denai
Jikok tak namuah, tanggang matonyo
Tanggang salero, bianyo rasai

Datang sijundai bianyo gilo
Siang jo malam nyo cari denai
Baru … baru lah sanang sikiro-kiro

padang bengkok

Padang Bengkok


Mandanga pakiak Rang Aia Bangih
Takajuik Puti Si Rajo Lauik
Dek badia bingkeh di parabek

Lah bungkuak udang dek manangih
Alang jo sikok nan barabuik
Si kikiah binguang nak mandapek

Bajalan dari Bunguih ka Aia Manih
Di hari akad pagi barambun
Dek taragak aia karambia mudo

Den cubo mamahek kato di ateh garih
Sairiang carito dalam pantun
Bakaliliang di ranah bundo tacinto

Lai mangaku Tuan urang Minang
Namun nan bateh nagari Tuan tak abeh
Acok bamanuang di rambang patang
Dek jaso ranah bundo nan indak tabaleh

Rindu manjanguak ranah jo dusun
Dicubo pulo bakaliliang kampuang
Randai jo bansi nan lah pansiun
Rabab jo saluang duduak tamanuang

Minangkabau luhaknyo tigo
Rantau batuah, lauiknyo sati
Elok dendangnyo si sopir oto
Apo ka tenggang si kusia bendi

Kudo japang tuo mangganyuak
“Motor Katutuih” denai namokan
Kawan bajalan salamo ko

Dulu Ujang — si paja gapuak
Langkok bagala si banyak makan
Makan ciek, tambuahnyo tigo

Kini si Ujang nan lah barubah
Lah rintang dek baka-el-er sajo
Diajak raun, inyo manggeleang

Tamanuang badan dek hiduik susah
Bakaliliang mangayuak si honda tuo
Nan ranah bundo galak tasengeang

Bia lah langkah denai ayunkan
Manjalang kalam di laruik sanjo
Iko lah kisah denai pantunkan
Panambah sayang ka ranah bundo

Sekian sambah panutuik kato
Sapuluah jari denai rapekkan
Kok ado salah jo kato
Bahati suci, tolong maafkan

BUYUANG KARISIAK


Buyuang Karisiak bagala yo si gadang ota
Kapalo batopang ondeh mak, muko balakang
Jikok maota di lapau ruoknyo ndak tingga
Dek sangkiang kincahnyo, tangangak rang mandanga

Co itu kato beh, si buyuang nan di palanta
Kok maota, tangan manggarik suok jo kida
Dek acok maota, tangguang jawab alah tingga
Anak lah merengek, bini lah resek panjang

Itu parangai Buyuang Karisiak
Pado karajo, elok nyo maota
Alah batuka langau jo rangik
Pagi jo patang, nyo di palanta

Tahun lah baganti, ondeh jaman lah batuka
Alah sampai gaek, Karisiak indak barubah
Balanjo di rumah indak ado nan nyo kana
Bininyo lah lari, Karisiak batuka aka

KUCIANG AIA...

Ondeh, yo sabana susaah bakawan jo kuciang aia huh

Ndak buliah takicuah wak dek nyo doh
Rokok di ateh meja, nyo santuang
Pitih dalam dompet den, nyo lapia
Tapi ndak baa jo den, ndak baa doh

Kini pacar den pulo nan nyo rabuik
Nyo rabuik, nyo larian
Alah bajanji den bulan bisuak ka kawin
Tingga manunggu NA se dari lurah lai
Nyo larian tu

Den pangaan lah paja
Aden, kok ndak basuo dek den bisuak caliak lah
Den nyanyak, sakik bana hati den

Dulaa … aah, oi Dulah

Dulunyo kito sairiang jalan, salapiak jo nan sakatiduran
Den ka ingkin, ang ka ingkin pulo, Dulah
Co itu bana awak bakawan
Cando gigi nan jo garaman

Ondeh, mesra pergaulan wak dulu mah, mesra …

Dulaa … aah, kana-kana lah dek ang, Dulah
Kana-kana bana lah dek ang

Barasok iduang ang, di saku den tasangkuik
Tatangkok ang mancilok ayam, aden juo nan mancabuik
Makan aden, bakilek pulo paruik ang, Dulah

Ko ndak maetong-etong suok bagai den ko doh
Labiah banyak pulo tambuah pado den lai, oi Dulah

Tapi kini ang barubah
Ang larian pacar den ka Jakarta
Mantang-mantang kini alah baoto
Aden yo bansaik basepeda unto

Malang nasib den, buruak lah tauncang
Abih harato den dek bakawan jo ang
Dek ulah ang ko mah, Dulah

Kok indak mampaturuikan salero ang
Alun tantu den ko doh, ka tauncang

Ang tandehan harato den
Kini ang pabuek pulo bantuak itu ka den
Sakik bana hati den ka ang

Baa kok sampai hati ang, Dulah
Sampai hati ang larian pacar den

Beko den puta gasiang tangkurak, baru tau raso ang
Kok ndak, den serakan kasiak tujuah oto, eh tujuah muaro
Baru mamanjek-manjek dindiang ang
Tau raso ang jo den

Dulaa … aah, Dul … Dul …

Dulunyo kito sairiang jalan
Kini ko kito sapajokian
Ang mangguntiang dalam lipatan ko mah kawan
Iyo baa juo lai … tangga gigi, guyah garaman

Ondeh mande …

Sulaa … aah, eh sasek den
Tapi kapalo ang tu lai sulah mah, bakilek …

Ambiak lah dek ang paja buruak tu
Kapalo sulah jo itam buruak, cocok tu mah
Isuak kok den kayo, den ganti jo nan labiah temok

Den ambiak baliak manjua cindua
Den sambiakan pulo sangenek ko, jadi tukang cukua
Tapi kapalo ang a pulo nan ka dicukua ko

Kuciang aia ang, Dulah
Yo cinabia ang, sulah

Kok den paturuikan, hati berang
Alah den puta kapalo ang tu jo ambacang
Den gisa kapalo ang nan sulah tu
Den palituak-palituakan gigi ang nan keluih tu
Den palituak-palituakan lihia ang nan keluih tu

Kok ndak takuik den masuak tangsi
Alah den lakak kapalo ang nan jo linggih
Ondeh, den lakak abihan kapalo ang tu
Sakik bana hati den jo ang

Dulu lamak se ang mangecek
Dunsanak ang ko, dunsanak den
Rang gaek ang, rang gaek den
Adiak ang, adiak den
Rokok ang, rokok den
Baju ang, baju den

Ndak baa di den, ndak baa doh …

Kini barubah dek ang
Bini ang, bini den
Calon bini den ang paambiak, calon bini den …

Ondeh, yo sakik bana …
Jan ang hawo-hawo pulo den jo oto ang tu lai, sulah

Kana-kana bana lah dek ang, kana-kana lah dek ang
Hiduik ang tu jo kawan-kawan, lai tau ang ndak
Kawan-kawan nan mampanjangan angok ang
Pinggang ka bawah tu se, urang gaek ang mamokokan nyo tu
Pinggang ka ateh tu lah jo kawan-kawan, jo kawan-kawan …

Kini lain dek ang tibonyo
Lupo kacang jo paraknyo dek ang
Lah tingga se parak lai
Beko den parok kapalo ang
Sakik bana hati den

KUCIANG AIA
Lamo ang lai, Dulah … lamo lai
Jan ang palagakan pulo oto ang tu ka den lai
Tau den tu mah

BPKB ang tu di dealer baru
Bautang oto ang tu
Bannyo tu samo jo kapalo ang
Samo-samo sulah

Ondeh, den pangaan lah ang ko lai …

Larian bana lah dek ang, larian bana lah
Beko balantak oto ang, balantak!
Sanang hati den caliak ang