Cilako..

Salamaik siang....

Ko ado stek a......

Buek dunsanak nan sakatiduran , nan sapamainan nan basabuikkan namo nan maimbaukan gala. diateh silang ba pangka karajo
nan bapokok, Bak kecek urang - urang tuo dulu, ingek - ingek sabalun kanai. Ingek di rantiang ka malantiang, ingek di duri kamancucuak
pado karam di tapi, eloklah karam di tangah. Namun bagi kito - kito ko nan gaek alun , mudo talampau iyo patuik di inokkan bana,
jan sampai kito ko karam di tapi, kanai cilako mudo kecek urang saisuak, karano cilako mudo ko ado macamnyo.

CILAKO MUDO
Cilako mudo ado tigo macamnyo :
 Partamo banamo Mudo Parisau
 Kaduo banamo Mudo Pangusau
 Katigo banamo Mudo Langkisau
Adopun Mudo  Parisau :
 Siang malam bahati rindu , Patang pagi bahati rambang , Balum bahimbau lah babunyi
 Balun dikubik nyo lah datang , Balun dijujai nyo lah galak ,  Bak katidiang tangga bingkai
 Bagai payuang tabukak kasau ,  Pahamnyo kambiang dek ulek , Sabab digilo angan-angan
 Itulah sifat mudo cilako
Adopun Mudo Pangusau :
 Iyolah bak pantun urang tuo
  Cincin perak duo parmato
 Cincin tambago bakilatan
 Lah ribuik sapanuah koto
 Adat rang mudo kasabutan

 Hilia mudiak inyo manyusah , Kiri kanan mamacah parang
 Dari jorong ka sapanuah koto ,  Dari kampuang ka saganok kampuang
 Barang taumbai nak mahelo,  Apo nan tampak nak manariak
 Inyo nak mandapek sajo,  Mamintak indak dengan suko
 Bagai balam tabang randah,  Ayam di lasuang tasimbada
Sabab dimabuak uwia-uwia
Adopun Mudo Langkisau :
 Itulah nan mudo lidah aia , Labuah sampik kudo panyipak
 Arang kareh lari manyimpang ,  Ikua kupik kapalo randah
 Jangguik taba ajaran kurang,  Aka buruak itikad salah
 Manaruah dangki jo khianat , Itulah mudo nan cilako
 Sabab takabua dalam hati ,  Indak mamakai raso pariso
 Indak manaruah malu jo sopan , Hereng jo gendeng apo layi.

kok lai tahinda dari cilako tuo, jan sampai lo isuak kito kanai cilako tuo,
CILAKO TUO
Cilako tuo ado tigo macamnyo :
Partamo banamo Tuo Nyinyia Tak Manantu
Kaduo Tuo banamo Tuo Damuik Badak Jantan
Katigo banamo Tuo Riang-riang Asam.
Adopun Tuo Nyinyia Tak Manantu :
 Bak malam talampau jinak ,  Maangguak-angguak ka tabuang aia
 Mancotok-cotok kili-kilinyo , Dimabuak kecek lunak lambuik
 Rundiang bak sarasah tajun , Indak mambari pangajaran
 Kato bak bunyi gunuang runtuah , Indak ba nasehat taba imanat
 Batutua ba olok-olok,  Manyingguang mato bisua urang
 Itulah tuo nan cilako,  Sabab indak ba ilimu
Adopun Tuo Damuik Badak Jantan :
 Tak saketek juo tahu di duri , Kulik suriah jangek lah luko
 Namun lenggok baitu juo,  Bagai kabau jalang kareh hiduang
 Parunyuik pambulang tali,  Indak tahu di mano kandangnyo.
 Bak ilimu tukang rabab,  Indak buliah bakandak hati
 Hanyo manuruik katonyo surang,  Saketekpun indak buliah disalahi
 Itulah tuo nan cilako,  Sabab msikin pado budi
Adopun Tuo Riang-riang Asam :
 Bagai kancah laweh arang,  Paham bagai tabuang sa rueh
 Kalau dapek galitiknyo,  Taruwah bana bak katidiang
 Kalau tak pandai mangawainyo , Tasuruak bana bak anjalai
 Kalau pandai ma uju-ujukan,  Dipujinyo bamuko-muko
 Tapi siapo nan indak manuruikkan,  Banyak upatan dari balakang
 Sampai  dicacek dihinokan,  Buruak dan aib dipatimbuakan
 Disinan syetan duduak bajuntai,  Pado lidahnyo iblis batahan
 Itulah tuo nan cilako,  Sabab tak kasiah akan ugamo.

Itulah na sihaik ari kini, dek ari alah rambang patang, lah lain caliak nyo mandua,
elok di tutuik molah kini,

Talatak puntiang di hulu
di bawah gumpalan tali
sakito hanyo dahulu
isuak kito ulang lai,

balaia biduak kapa cino
masuak kualo banda perak
sauh di lapeh di nan dalam.
ambo pai jan maibo,
ambo mahilang  jaan taisak,
ambo suadahi jo wassalam.