padang bengkok

Padang Bengkok


Mandanga pakiak Rang Aia Bangih
Takajuik Puti Si Rajo Lauik
Dek badia bingkeh di parabek

Lah bungkuak udang dek manangih
Alang jo sikok nan barabuik
Si kikiah binguang nak mandapek

Bajalan dari Bunguih ka Aia Manih
Di hari akad pagi barambun
Dek taragak aia karambia mudo

Den cubo mamahek kato di ateh garih
Sairiang carito dalam pantun
Bakaliliang di ranah bundo tacinto

Lai mangaku Tuan urang Minang
Namun nan bateh nagari Tuan tak abeh
Acok bamanuang di rambang patang
Dek jaso ranah bundo nan indak tabaleh

Rindu manjanguak ranah jo dusun
Dicubo pulo bakaliliang kampuang
Randai jo bansi nan lah pansiun
Rabab jo saluang duduak tamanuang

Minangkabau luhaknyo tigo
Rantau batuah, lauiknyo sati
Elok dendangnyo si sopir oto
Apo ka tenggang si kusia bendi

Kudo japang tuo mangganyuak
“Motor Katutuih” denai namokan
Kawan bajalan salamo ko

Dulu Ujang — si paja gapuak
Langkok bagala si banyak makan
Makan ciek, tambuahnyo tigo

Kini si Ujang nan lah barubah
Lah rintang dek baka-el-er sajo
Diajak raun, inyo manggeleang

Tamanuang badan dek hiduik susah
Bakaliliang mangayuak si honda tuo
Nan ranah bundo galak tasengeang

Bia lah langkah denai ayunkan
Manjalang kalam di laruik sanjo
Iko lah kisah denai pantunkan
Panambah sayang ka ranah bundo

Sekian sambah panutuik kato
Sapuluah jari denai rapekkan
Kok ado salah jo kato
Bahati suci, tolong maafkan